Ai Vola I Isaia, na Parofita 62 - AI VOLA TABU（FIJ1864）

A Mesaia, ena gumatuataka na nona cakacaka e na vukudra nai vavakoso lewe ni soro, me ra vinaka sara, 1-5. Sa vakarota vei ira me makututaka na dauyadra kei na masu, me yaco na ka sa yalataki, 6-9; me ra tukuna voli talega nai rogorogo vinaka ki nai yalayala kei vuravura, 10-12.

1E NA vuku i Saioni kaʼu na sega ni tiko lo, kei na vuku i Jerusalemi kaʼu na sega ni vakacegu, ka me lako mada yani na nona veivakadonui me vaka na ka sa serau, kei na nona veivakabulai me vaka na cina sa caudre.

2Ia na veimatanitu, era na raica na nomu veivakadonui; kei ira kecega na tui, na kemui ukuuku: ia ko na vakatokai o na yaca vou, o qori ena cavuta na gusu i Jiova.

3Ia ko na yaco mei sala vakaiukuuku o na liga i Jiova, kai sala vakatui e na qeteqete ni liga ni nomu Kalou.

4O na sega ni vakatokai tale ko Biu; ia na nomu vanua ena sega ni vakatokai tale ko Lala; o na vakatokai ga ko Marautaki, kei na nomu vanua ko Vakawati: ni sa marautaki iko ko Jiova; ia na nomu vanua ena vakawati.

5Ni sa vaka na cauravou sa rau veiwatini kei na gonealewa, ena veiwatini vakakina kei iko ko ira na luvemu; ia me vaka na tagane sa qai vakawati sa marautaka na watina, ena marautaki iko vakakina na nomu Kalou.

6E dela ni nomu bai, Jerusalemi, kaʼu sa lesia nai vakatawa, a ra na sega ni tiko lo se kei na siga se na bogi; oi kemudou sa vakananumi Jiova, dou kakua ni vakacegu,

7kakua talega ni laivi koya me vakacegu, ka me vakataudeitaka mada, ka me cakavi Jerusalemi mada me ka e vakacaucautaki e vuravura.

8Sa vosavavakini ko Jiova e na ligana i matau kei na ligana kaukauwa, Kaʼu na sega sara ni solia tale na nomu sila me kedra na nomu meca, ia ko ira na kai tani era na sega sara ni gunuva na memu waini, o koya ko sa oca ni cakava:

9o ira ga era sa kumuna era na kania, ka vakavinavinaka vei Jiova; kei ira era sa binia era na gunuva e na noqu lomanibai tabu.

10Dou curu, curu yani ki na veimatamata-ni-koro; caramaka na nodra sala na tamata; vakacerea, vakacerea na salatu; biuta tani na vatu; vakaduria na rogele vei ira na tamata.

11Raica, o Jiova sa vakarogotaka ki nai yalayala kei vuravura, Dou kaya vua na gonealewa ni Saioni, Raica, sa lako mai na nomui Vakabula; raica, na nonai voli sa tu ga vua, kei na ka ni nona cakacaka sa tu e matana.

12A ra na vakatokai ira, Na mataqali yalosavasava, O ira sa Vakabula ko Jiova: ia ko na vakatokai, Ko Domoni, ko Koro tawa biu.