Ai Vola I Isaia, na Parofita 53 - AI VOLA TABU（FIJ1864）

Ni ta lako mai na Mesaia sa tawa vakabauti, ni sa lako vakamalumalumu mai, 1-3. Sa vakararawataki e na vukuda, ka sega e na vukuna, 4-9. Ni sa qai oti na gauna ni nona rarawa, ena qai yaco na gauna ena vakarokorokotaki kina, e na vuku ni sa sorovaki keda na tamata, 10-12.

1O CEI sa vakabauta na neitoui tukutuku? ia na liga i Jiova, sa vakatakilai vei cei?

2A sa tubu cake ko koya me vaka na coke e matana, ka vaka na waka mai na qele mamaca: sa sega ni vinaka na matana se na yagona; ia ni da sa raici koya, sa sega na nonai ukuuku me da domoni koya kina.

3Sa beci koya ka biuta ko ira na tamata, sa tamata e daurarawa na lomana, a sa daukila ka rarawa: a sa vaka eda sa tabonaka na matada maivei koya; sa beci, io, eda a sega ni dokai koya.

4E dina ni sa noda ka rarawa sa laveta ko koya, a sa rarawa ni lomada sa colata: ia eda a nanumi koya me sa yaviti ka lauti vua na Kalou, ka vakararawataki:

5a sa vuetaki ga ko koya e na vuku ni noda talaidredre, a sa qaqi e na vuku ni noda caka cala: na cudruvi sa vu ni noda veivinakati tale sa tauci koya; ia e na we ni kena kuita eda sa vakabulai kina.

6Oi keda kece eda sa sese ga me vaka na sipi; ki na dui noda sala eda sa dui lesu tani kina; ia ko Jiova sa vakatauca vei koya na noda caka cala kecega.

7Sa vakasaurarataki, a sa vakamalumalumu ga ko koya, ia ena sega ni dalaga na gusuna; me vaka na lami sa tuberi me vakamatei, ka vaka na sipi sa galu e na mata i koya sa kotiva, ia ena sega ni dalaga na gusuna.

8Mai na veivakararawataki kei na veilewai sa kauti tani yani ko koya; ia ko cei vei ira na nonai tabatamata me na veinanuyaka, ni sa muduki tani ko koya mai na vanua ni bula e na vuku ni nodra talaidredre na noqu tamata, me sa yaviti e na vukudra?

9A sa soli me ratou buluti vata kei na tamata ca, ia ni sa mate dina ko koya, sa soli ga vua na vutuniyau; ka sega ga e na vuku ni sai valavala vakaukauwa, a sa sega na veivakaisini e na gusuna.

10Ia ko Jiova sa vinakata me qaqi koya, sa vakararawataka ko koya; ni sa qai cakava na yalona mei soro e na vuku ni valavala ca, ena qai kunea na nona kawa, ena vakabalavutaka na nona siga, ia na veitalia i Jiova e ligana ena yaco ga.

11Na vua ni veivakaocataki ni yalona ena kunea ko koya, ena vakamamautaki ga: ni ra kilai koya na noqui talatala ni sa yalododonu, ena vakadonui ira kina na lewe vuqa; ni na colata ko koya na nodra caka cala.

12O koya o qo kaʼu na votai koya kina kei ira na lewe vuqa, ia kei ira sa kaukauwa ena votai koya dina e nai toki ni valu; e na vuku ni sa sovadiva na nona bula ka mate: a sa wili vata kei ira na dautalaidredre; a sa colata ko koya na nodrai valavala ca na lewe vuqa, ia e na vukudra na dautalaidredre ena ia na veimasulaki.