1RAICI koya na noqui talatala, kaʼu sa tokona; o koya kaʼu a digitaka, ka sa vinakata na vu ni lomaqu; au a solia vua na Yaloqu; ena vakayacora ko koya na lewa dodonu ki na veimatanitu:
2ena sega ni qolou, se kaila, se vakarogotaka na domona e nai saqata ni koro:
3ena sega ni musuka na gasau sa bibivoro, se bokoca na wa ni cina sa kubou walega; e na ka dina ena vakayacora ga kina na lewa dodonu:
4ena sega ni gu ca se yalolailai, ka malua me na vakataudeitaka na lewa dodonu e vuravura: ia ena waraka na nona vunau na veiyanuyanu.
5Sa vosa vakaoqo na Kalou ko Jiova, o koya ka bulia na lomalagi, ka tevuka; o koya ka dedeka na vuravura, kei na ka sa tubura; o koya sa solia na nodra cegu na tamata e delana, kei na yalodra era sa lako voli kina:
6oi au ko Jiova kaʼu a kacivi iko e na noqu yalododonu, kaʼu na tubera na ligamu, ka maroroi iko, ka soli iko mo veiyalayalati kei ira na tamata, mo nodra rarama na veimatanitu;
7mo basuka na mata sa boko, mo kauti koya mai na vale ni veivesu e sa vesuki, kei ira mai na vale ni veivakabobulataki era sa tiko e na butobuto.
8Oi au ko Jiova; o qori na yacaqu; na vakarokoroko sa dodonu me ia vei au kaʼu na sega ni solia vua e dua tani; se na vakavinavinaka sa dodonu me ia vei au ki na matakau ceuceu.
9Na ka sa tukuni makawa, raica, sa yaco ga, ia kaʼu sa qai tukuna na ka vou: ni sa sega i ni tubu mai, kaʼu sa vakarogotaka vei kemudou.
10Dou meketaka vei Jiova na meke vou, na vakavinavinaka vua mai nai yalayala kei vuravura, oi kemudou sa lako sobu ki na wasawasa, kei na ka kecega sa sinai kina; na veiyanuyanu, kei na lewena:
11na lekutu kei na kena veikoro, me tabalaka na domodra; na veikoro sa tiko kina ko Kitari: o ira sa tiko e na Uluvatu, me ra ia na meke; me ra kaila mai na dela ni veiulu-ni-vanua:
12me ra ia na vakavinavinaka vei Jiova, ka vakacaucautaki koya e na veiyanuyanu.
13Ena lako yani me vaka na qaqa ko Jiova; ena vakauqeta na nona cudru me vaka na tamatai valu: ena kaila ko koya, io, ena qoqolou; ena gumatua vei ira na nona meca.
14Sa dede na noqu tiko lo; au a tiko ga, kaʼu a dautarovi au: ia o qo, me vaka na alewa sa taratara, kaʼu na qoqolou; kaʼu na vakarusa ka tiloma sara:
15kaʼu na vakalalataka na veiulu-ni-vanua kei na veiulu-ni-koro, ka vakamalaitaka kecega na kedra co; kaʼu na vukica na uciwai mo yanuyanu, ka vakadiva na drano;
16kaʼu na tuberi ira na mataboko e na sala era sa lecava: kaʼu na kauti ira e nai lakolako era sa tawa kila: kaʼu na cakava na butobuto e matadra me rarama, kei na ka takelo me dodonu. Na ka o qo kaʼu na cakava vei ira, ka sega ni vakalaivi ira.
17Era na vakalesui kimuri, era na madua vakalevu sara, ko ira era sa vakararavi ki na matakau ceuceu, era kaya ki na matakau e vakawaicalataki, Oi kemudou na neimami kalou.
18Oi kemudou na didivara, dou rogoca! oi kemudou na mataboko, dou yadra, mo dou raica!
19Se ko cei beka sa mataboko, se ko koya ga na noqu tamata? ia ko cei sa didivara me vakataki koya na noqui talatala kaʼu sa tala? o cei sa mataboko me vakataki koya sa dodonu, ka mataboko me vakai koya na tamata i Jiova?
20Sa vuqa na ka ko raica, ka sa sega ni vakasama; sa talai me basuka na daliga, ia ka sa sega ni rogoca ko koya.
21Sa yalovinaka ko Jiova e na vuku ni nona yalododonu; ena vakalevulevuya na vunau, ka vakarokorokotaka.
22Ia na mataqali o qo era sa kovei ka butakoci; era sa vauci kecega e nai keli, ka vunitaki e na vale ni veivesu: era sa tokitaki, ka sa sega e Vakabula; era sa butakoci, ka sa sega e kaya, Dou vakasuka tale.
23O cei vei kemudou ena vakatu daliga ki na ka o qo, me vakarorogo ka rogoca e na gauna sa muri mai?
24O cei sa soli ira na Jekope me tokitaki, kei ira na Isireli kivei ira na daubutako? o Jiova, o koya eda sai valavala ca vua, se segai? ka ni ra sa bese ni muria na nona sala, a ra sa sega ni vakarorogo ki na nona vunau:
25a sa sova kina vei ira ko koya na nona cudru katakata, kei nai valu kaukauwa: a sa vakama vakavolivoliti ira, a ra tawa kila ga: a sa kati ira, a ra sa tawa vakasara ki lomadra.
Who We AreWhat We EelieveWhat We Do
2025 by iamachristian.org,Inc All rights reserved.
