A Nonai Vola Na Dauvunau 4 - AI VOLA TABU（FIJ1864）

Sa ca na tamata e na vuku ni valavala kaukauwa, 1-3; kei na vutu, 4-6; kei na kocokoco, 7, 8; kei na tiko duaduaga, 9-12; kei na yalokaukauwa, 13-16.

1IA kaʼu a qai lesu tale, ka kunea na veivakasaurarataki kece sa caka e ruku ni siga: ka, raica, sa vakawai na matadra era vakasaurarataki, ka sa sega e vakacegui ira; ia sa tu vei ira na dauveivakasaurarataki na kaukauwa; ia ka sa sega e vakacegui ira.

2O koya o qo kaʼu a vakacaucautaki ira vakalevu kina na mate era sa mate oti, ka vakalailai na bula era bula tiko.

3Ia sa ca ruarua koi rau o qo ka vinaka ko koya e sa sega ni sucu mai, o koya e sa sega ni kunea na cakacaka ca sa ia e ruku ni siga.

4Au a nanuma tale na oca kecega, kei na cakacaka dodonu kecega; ni sai koya o qo sa vuvutaki kina na tamata vua na kai nona. O qo tale na ka walega kei na ocaoca wale.

5A yalolialia sa roqoveinu na ligana, ka kania na lewena.

6Sa vinaka ni tawa tu na liga e dua bau ni tu vata kei na vakacegu, ka ca ni tawa tu na liga ruarua ni tu vata kei na oca kei na yalorarawa.

7Ia kaʼu a qai lesu tale ka kunea na ka walega e ruku ni siga.

8Sa tiko e dua na tamata, ka sega na kenai sa; io, sa sega na luvena se tacina: a sa tawa mudu ga na nona veiogai kecega; a sa sega ga ni mamau na matana e nai yau; a sa sega ni kaya, E na vuku beka i cei kaʼu sa oca kina, ka vakatabuya na vinaka ki yaloqu? O qo tale na ka walega, io, sa dua na oca ca.

9Sa vinaka ni lewe rua ka ca ni lewe dua bauga; ni sa nodrau kina nai voli; vinaka ni nodrau cakacaka.

10Kevaka sa bale e dua, ena tubera cake na kenai sa: ia ena ca vua sa tiko duadua ni sa bale; ni sa sega e dua tale me tuberi koya cake.

11O qo talega, kevaka sa koto vata e lewe rua, erau na katakata: ia ke lewe dua ga, ena katakata vakaevei ko koya?

12Ia kevaka e dua na tani sa gumatua vua e dua, ke rau lewe rua ke rau na vorata rawa; ia na dali e turai-tolu ena sega ni cavuka rawarawa.

13Sa vinaka na gone sa dravudravua ka vuku, ka ca na tui sa qase ka yalolialia, a sa bese ni vunauci tale:

14ni sa curu mai ko koya e dua mai na vale ni veivesu mo buli; ia e na nona matanitu kadua sa dravudravua ga e sa sucu kina.

15Au a vakananumi ira kece na bula era lako voli vata e ruku ni siga, kei koya nai karua ni gone turaga sa rau veitaravi:

16sa tawa wiliki kece rawa na tamata, io ko ira kece era sa via tiko e matadrau: ia ko ira era sa muri mai era na tawa vinakati koya tiko. E dina na ka tale o qo sa ka walega kei na ocaoca wale.