Ai Vola Vakaibalebale 13 - AI VOLA TABU（FIJ1864）

1A GONE vuku sa rogoca nai vakavuvuli i tamana: ia ko koya na dauveivakalialiai sa sega ni rogoca ni sa vunauci.

2Mai na vua ni gusuna ena kana ki na ka vinaka ko koya na tamata: ia na yalodra na dautalaidredre ena kana ki nai valavala kaukauwa.

3O koya sa qarauna na gusuna sa qarauna na nona bula: ena kena ga na rusa e sa dalaga sara na tebenigusuna.

4Sa gagaro na lomana, ka sega na kena, na vucesa: ia na lomana na dautara ka ena uro mai.

5Sa cata ni vosa lasu na yalododonu: ia na tamata ca sa ka vakalialia, a sa vakamaduataki.

6A nona caka dodonu nai valavala dodonu sa maroroi koya: kei na nona caka ca nai valavala ca sa vukici koya.

7Sa dua e sa vakavutuniyautaki koya, a sa sega na nona ka: sa dua e sa vakadravudravuataki koya, a sa levu tu ga na nonai yau.

8A kena ka ni bula na tamata na nonai yau; ia ka sa sega ni vunauci na dravudravua.

9A nodra rarama na yalododonu sa reki: ia na nodra cina nai valavala ca ena bokoci ga.

10A yaloviavialevu ga e sa tubu kina na veileti: a sa nodra ga na daubose na vuku.

11Ai yau ni sa biu wale ena vakalailaitaki: ia ko koya sa kumuna e na dautara ka ena vakalevutaki.

12A vakanananu ki na ka sa bera e daumate kina na yaloda: ia sa kau ni bula ni sa lako mai na ka e domoni.

13O koya sa beca na vosa ena rusa: ia ko koya sa rerevaka na vunau ena vakacegui kina.

14A vunau nai vurevure ni bula vei koya na vuku me lako tani kina mai nai cori ni mate.

15A vuku dina e sa lomani kina na tamata: ia na nodra sala na dautalaidredre sa sukusukura.

16O ira kece na yaloqase era daucaka vakavuku: ia na lialia sa tevuka na nona lialia.

17Ai talaki ca sa lutuka na ca: ia nai talatala lomadina sa ia na veivakabulai.

18A dausiga kei na madua ena nona e sa bese ni vakavulici: ia ko koya sa vakabauta na vunau ena vakarokorokotaki.

19A ka e domoni ka sa rawa sa ka kamikamica ki na yaloda: ia ka sa ka vakasisila vei ira na lialia me lesu tani mai na ca.

20O koya sa malele vata kei ira na vuku ena vuku: ia ko koya era veitokani kei na lialia ena rusa.

21O ira nai valavala ca a ca ga ena muri ira: ia vei ira na yalododonu ena soli ga kina na ka vinaka.

22A tamata vinaka e tataunaka na ka me ra taukena na luve ni luvena: a sa maninitaki me nona na yalododonu nai yau ni tamatai valavala ca.

23Sa levu na kakana e nona were na dravudravua: ia ka sa tiko e sa ca ni sa tawa caka dodonu.

24O koya sa maroroya na kuita sa cata na luvena: ia ko koya sa lomani koya sa vakanakuitataka ni sa gone.

25Sa kana na yalododonu me mamau kina ko koya: ia na ketedra na tamata ca ena viakana ga.