Ai Vola Vakaibalebale 11 - AI VOLA TABU（FIJ1864）

1AI vakarau lasu na ka vakasisila vei Jiova: ia nai vakabibi dodonu na ka e vinakata.

2Ni sa tubu mai na viavialevu, sa tubu talega kei na madua: ia sa vei ira na yalomalumalumu na vuku.

3A nodra lomadina na yalododonu ena tuberi ira: ia na nodra yaloveve na talaidredre ena vakarusai ira.

4Sa sega ni yaga nai yau e na siga ni cudru: ia nai valavala dodonu na ka e sa vakabulai kina mai na mate.

5A nona yalododonu na lomadina ena vakadodonutaki kina na nona sala: ia e na nona ca dina na tamata ca ena bale ga kina ko koya.

6A nodra caka dodonu na yalododonu na ka era na bula kina: ia e na nodra caka ca na tamata be era na rawai kina.

7Ni sa mate na tamata ca, sa yali na ka e nanuma kina: a ka era namaka na tawa yalododonu ena yali ga.

8Sa dauvakabulai mai na ka rarawa na yalododonu, a sa yaco na tamata ca me kenai sosomi.

9E na vuku ni gusuna na dauveivakaisini sa ca kina na kai nona: ia ni ra sa vuku na yalododonu, era sa vakabulai kina.

10Ni ra sa tamata yaco na yalododonu, sa reki na koro: ia ni ra sa rusa na tamata ca, sa ia na kaila.

11Ni ra sa ia na vosaveivakalougatataki na yalododonu, sa vue na totoka ni koro: ia e na gusudra na tamata ca sa vukici kina.

12Sa beca na kai nona ko koya na tawa vuku: ia na tamata yalomatua sa na tiko lo.

13O koya sa lako voli ka daukakase sa tukuna tiko na ka e tabu: ia ko koya sa yalodina e dau vunia na ka.

14Ni sa sega na bose vuku, ena ca na tamata: ia ka sa bula ga ni sa lewe vuqa na daubose.

15Ena kune ka rarawa ko koya sa ia na veiyalayalati mei sosomi ni kai tani: ia ko koya sa cata ni ia na veiyalayalati sa na yalodei.

16Na alewa yalovinaka sa taura tiko na kenai rogo vinaka: kei na tagane kaukauwa era sa taura tiko nai yau.

17A tamata yalololoma sa caka vinaka ki na yalona vakai koya: ia ka sa vakararawataka na yagona dina ko koya na lomaqa.

18O koya na tamata ca sa daucaka vakailasu: ia vei koya sa kaburaka nai valavala dodonu ena dua dina kina na kenai sau vinaka.

19Me vaka nai valavala dodonu ni sa ka me bula kina: sa vakakina ko koya sa cicimuria na ca, ena mate kina ko koya.

20Era ka vakasisila vei Jiova ko ira na yaloveve: ia ka sa vinakati ira sa dodonu na nodrai valavala.

21Ke ra veitauri liga, ke sa sega ga me na tawa cudruvi e sai valavala ca: ia na nodra kawa na yalododonu era na vakabulai.

22Me vaka na mama koula e na ucu ni vuaka, sa vakakina na alewa matavinaka ka sa tawa yalomatua.

23A ka era gadreva ko ira na yalododonu na ka vinaka duaduaga: ia na ka era namaka ko ira nai valavala ca na cudru.

24Sa dua e sa duibiubiuta, a sa tubu ga me levu; sa dua talega e sa maninitaka na ka ni sa tawa dodonu, a sa tubu ga na dravudravua.

25A lomadausoli ena uro mai: ia ko koya sa vagunuva ena vagunuvi talega ko koya.

26O koya sa maninitaka na sila, era na rukaki koya na tamata: ia na vosaveivakalougatataki ena tauca na ulu i koya sa volitaka.

27O koya sa gumatua ni caka vinaka ena kune loloma: ia ko koya sa gu ni caka ca, ena yaco vua.

28O koya sa vakararavi e na nonai yau ena bale: ia na yalododonu era na bulabula me vaka na taba ni kau.

29O koya sa vakararawataka na nona vale, sa na taukena na cagi: o koya talega sa lialia ena qaravi koya na lomavuku.

30A ka e sa vuataka ko koya na yalododonu sa kau ni bula, o koya talega sa rawa na yalo sa vuku.

31Kaica, o ira na yalododonu era na cudruvi e vuravura: ka vakalevu cake ko koya na dautalaidredre kei nai valavala ca.