Ai Vola Vakaibalebale 3 - AI VOLA TABU（FIJ1864）

A talairawarawa, 1-4. A vakabauta kei na yalomalumalumu, 5-8. A daulomasoli, 9, 10. A vosota, 11, 12. A kena talei na ruku, 13-20. A kena yaga, 21-26, Ai vakaro me ia nai valavala loloma, 27-29, kei na veivinakati, 30; me kakua ni vuvutaka na tamata ca, 31-35.

1NA luvequ, mo kakua ni guilecava na noqu vunau; ia me taura tiko na noqui vakaro na lomamu:

2ni na vakaikuritaka vei iko na siga e vuqa, kei na bula balavu, kei na sautu.

3Me kakua ni takali vei iko na yalololoma kei na dina: mo vakataubena mada kina; mo vola ki na dela ni lomamu:

4o na qai kunea na loloma kei na vuku dina e na mata ni Kalou kei na tamata.

5Mo vakararavi vei Jiova mai na vu ni yalomu: ka kakua ni ravita na nomu yalomatua:

6mo vakarogotaka vua na nomu sala kecega, ia ena vakadodonutaka na nomui lakolako ko koya.

7Mo kakua ni nanumi iko me vuku: mo rerevaki Jiova, ka lako tani mai na ca:

8ena bula kina na nomu vicovico, ka vakauto kina na suimu.

9Mo vakarokorokotaki Jiova e na nomui yau, kei nai sevu ni nomu vuata kecega:

10ena qai sautu sara kina na nomu lololo, ka vuabale na nomui keli-ni-waini e na waini vou.

11Na luvequ, mo kakua ni beca ni sa yaviti iko ko Jiova; se yalowai ni sa vunauci iko ko koya:

12ni sai koya sa lomana ko Jiova, sa vunauca ko koya; me vaka sa ia na tamata vua na luvena e sa vinakata ko koya.

13Sa kalougata na tamata sa kunea na vuku, kei na tamata sa rawata na yalomatua:

14ni sa vinaka na dauveivoli kina ka ca na dauveivoli e na siliva, a kena tubu talega sa vinaka ka ca na kena tubu na koula dina.

15Sai yau levu ko koya, kai yau lailai na mata-ni-civa: ia na ka kecega ko sa domona sa sega ni yaga me vakatauvatani kaya:

16a bula balavu sa tiko e na ligana i matau; e na ligana i mawi nai yau kei na vakarokoroko:

17a nona sala na sala vinaka, a nonai lakolako kece talega na sautu:

18a kau ni bula ko koya vei ira era vauca; a sa kalougata ko koya sa taura matua.

19Sa tauyavutaki vuravura ko Jiova e nona vuku; a sa vakarautaki lomalagi e nona yalodaulewa:

20e nona yalomatua sa basuki mai kina na wai titobu, a sa tau mai na tegu mai na o.

21Na luvequ, me kakua ni yali e matamu na ka o qori: mo taura ga na vuku dina kei na lomakasa:

22ena qai kena bula na yalomu, kei na kenai ukuuku na domomu:

23o na qai lako vakavinaka e na nomu sala, ia na yavamu ena sega ni tidara:

24ni ko sa davo sobu, ko na sega ni rere; io, ko na davo sobu, ena kamikamica talega na nomu moce;

25kakua ni ko rerevaka na rere vakidacala, se na nodra rusa nai valavala ca, ni sa yaco:

26ni na nomu ka me vakararavi kina ko Jiova, ena tarova na yavamu ko koya me kakua ni coriti.

27Mo kakua ni bureitaka na ka yaga vei ira e dodonu me nodra, ni sa rawa vei iko mo cakava:

28kakua ni kaya vua na kai nomu, Mo lako mada, mani lako tale mai, au na qai solia vei iko e na sabogibogi; ka ni sa tu na ka vei iko.

29Kakua ni kitaka na ka ca vua na kai nomu, ni sa tiko vakavinaka kei iko.

30Kakua ni veileti walega kei na tamata e dua, kevaka sa sega ni caka ca vei iko.

31Mo kakua ni vuvutaka na tamata lomaqa, mo kakua talega ni digitaka e dua na nona sala:

32ni sa ka vakasisila vei Jiova na yalovakatani: a sa lasa ga kei ira na yalododonu na nona vosa vuni.

33A cudru i Jiova sa tiko e na nodra vale nai valavala ca: a sa vakalougatataka ko koya na nodrai tikotiko na yalododonu.

34E dina sa vakalialiai ira ko koya era sa dauveivakalialiai: a sa solia na ka ni loloma vei ira na yalomalumalumu.

35O ira na vuku, era na taukena na vakarokoroko: ia ena dui nodrai votavota na lialia na madua.