Meke 147 - AI VOLA TABU（FIJ1864）

Me ia na vakavinavinaka vei Jiova.

1DOU ia na vakavinavinaka vei Jiova: ni sa ka vinaka me meketaka na vakavinavinaka vua na noda Kalou; ni sa ka kamikamica; a sa ka kilikili na vakavinavinaka.

2Sa tarai Jerusalemi cake ko Jiova: sa soqoni ira vata na Isireli era sa vakasevi.

3Sa vakabulai ira sa ramusu na yalodra, a sa vivia na nodra vue.

4Sa wilika ko koya na kedrai wiliwili na kalokalo; sa vakatoka kecega na yacadra.

5Sa levu na noda Turaga, ka levu na nona kaukauwa: a sa sega ni kilai rawa na nona vuku.

6Sa vakalevulevui ira na yalomalumalumu ko Jiova: sa vakabalei ira ki na soso nai valavala ca.

7Dou serevaka na vakamolimoli vei Jiova: dou meke e na api vua na noda Kalou:

8o koya sa tabonaka na lomalagi e na o, o koya sa cokonaka na uca me tauci vuravura, o koya sa vakatubura na co e na veiulu-ni-vanua.

9O koya sa solia na kedra na manumanu, kei na kedra na luve ni reveni ni sa tagi.

10Sa sega ni marautaka ko koya na kaukauwa ni ose: sa sega ni rekitaka na yava ni tamata.

11Sa rekitaki ira ko Jiova era sa rerevaki koya, ko ira era sa namaka na nona loloma.

12Mo vakavinavinaka vei Jiova, Jerusalemi; mo ia na vakavinavinaka vua na nomu Kalou, Saioni.

13Ni sa vakaukauwataka ko koya nai sogo ni nomu matamata-ni-koro; sa vakalougatataki ira na luvemu e na nomu loma ni koro.

14Sa vakayacora na sautu ko koya e na nomu vanua, a sa vakamamautaki iko e na witi vinaka sara.

15Sa tala yani na nona vunau e vuravura: sa cici vakusakusa sara na nona vosa.

16Sa solia mai na uca-vulavula me vaka na vutika ni sipi: sa vakamimiraca na tegu cevata me vaka na dravu.

17Sa vakatala na nona wai cevata me vaka na meme ni kakana: o cei sa tu rawa e na mata ni nona liliwa?

18Sa tala na nona vosa ko koya, ka waicalataka: sa cakava na nona cagi me liwa, sa qai dave na wai.

19Sa tukuna na nona vosa vei ira na Jekope, a nona vunau kei na nona lewa vei ira na Isireli.

20Sa sega ni caka vakaoqo ko koya ki na matanitu e dua: kei na nona lewa, era sa sega ni kila. Dou ia na vakavinavinaka vei Jiova.