Meke 132 - AI VOLA TABU（FIJ1864）

Sa tukuna ko Tevita na nona nanuma na kato ni veiyalayalati, 1-7; sa masu ni sa kau, 8-10. A vosa ni yalayala ni Turaga, 11-18.A Meke ni cabecabe.

1I JIOVA, mo nanuma e na vuku i Tevita na nona rarawa kecega:

2ni sa vosavavakini ko koya vei Jiova, ka ia na veiyalayalati kei Koya na Kaukauwa nei Jekope, ka kaya,

3Au na sega mada ni curu ki na vale malo kaʼu sa tiko kina, se cabe ki nai mocemoce kaʼu sa koto kina:

4au na sega ni solia na mataqu me moce, se na dakudaku-ni-mataqu me sosovu,

5ia kaʼu na kunea mada eliu e dua na yasana me nei Jiova, nai tikotiko me nei Koya na Kaukauwa i Jekope.

6Raica, eda a rogoca ni sa tiko mai Efiraca: eda a kunea mai Kiriaci-yiarimi.

7Eda na curuma na nonai tikotiko; eda na cuva ki nai tutu-ni-yavana.

8Mo cabe cake, Jiova, ki na nomui vakavakacegu, o iko, kei na kato ni nomu kaukauwa:

9me ra vakaisulu e na yalododonu ko ira na nomu bete; ka qoqolou e na reki ko ira na nomu tamata yalosavasava.

10E na vuku i koya na nomu tamata ko Tevita me kakua ni gole tani na matamu vua ko a lumuta.

11Sa vosavavakini vakaidina ko Jiova vei Tevita; ena sega ni lesu tani maikina; Maivei ira na vua ni yagomu kaʼu na vakatikora na kemui sosomi e na nomui tikotiko vakaturaga:

12kevaka ena vakabauta na noqu veiyalayalati ko ira na luvemu, kei na noqu vunau a ya kaʼu na vakatavulica vei ira, ena tiko talega ko ira na luvedra ka tawa mudu e na nomui tikotiko vakaturaga.

13Ni sa digitaki Saioni ko Jiova; sa vinakata ko koya me nonai tikotiko.

14O qo na noqui vakavakacegu ka tawa mudu: au na tiko ga eke; niʼu sa vinakata.

15Au na vakalougatataka vakalevu na kena kakana: au na vakamamautaki ira kina era sa dravudravua, e na madrai.

16Au na vakaisulutaki ira talega na nona bete e na bula: era na qoqolou talega e na reki na nona tamata yalosavasava.

17Au na cakava me kubu maikina na kaukamea i Tevita: au sa vakarautaka na cina me nei koya kaʼu sa lumuta.

18Au na vakaisulutaki ira na nona meca e na madua: ia e na uluna ga ena seraki tu na nonai sala.