Meke 50 - AI VOLA TABU（FIJ1864）

A dauveilewai rerevaki na Kalou, ena sega ni yaga vua nai valavala ni lotu vakailasu; sa vinakata ga nai valavala dina.A Meke i Asafi.

1O KOYA sa Kaukauwa, na Kalou, io, ko Jiova, sa vosa oti, a sa kacivi vuravura mai na yasana sa cadra kina na siga ka yacova na yasana sa dromu kina.

2Mai Saioni, na koro lagilagi duaduaga, sa cila mai na Kalou.

3Ena lako mai na noda Kalou, ena sega ni galu: ena liutaki koya e dua na buka sa daukatikati, ia ena cava vakaidina ka sa voliti koya.

4Ena kaciyi lomalagi maicake ko koya, kei vuravura talega, me lewai ira na nona tamata, ena kaya,

5Dou vakasoqoni ira vata na noqu tamata yolosavasava; o ira era sa ia na veiyalayalati kei au ni ra vakamatea nai soro.

6Ia na lomalagi ena tukuna na nonai valavala dodonu: ni sa lewa na Kalou vakai koya ga. Sela.

7Dou rogoca, na noqu tamata, ni kaʼu na vosa; o iko Isireli, kaʼu na tukuna na nomu cala: oi au ga na Kalou, na nomu Kalou.

8Au na sega ni vunauci iko e na vuku ni nomui soro kei na nomui soro kama ka sa tawa mudu e mataqu.

9Au na sega ni kauta tani e dua na karavau mai na nomu vale, se na koti tagane mai na nomu bai ni koti:

10ni sa noqu ga na karavau kila kecega mai na veikaukau, kei na karavau lasa mai na veiulu-ni-vanua e vakaudolu.

11Au sa kila yadua na manumanu vuka mai na veiulu-ni-vanua: a sa tiko kei au na manumanu kecega ni vanua.

12Kevaka kaʼu sa viakana, kaʼu na sega ni tukuna vei iko: ni sa noqu ko vuravura, kei na ka kecega sa sinai kina.

13Au na kania li na lewe ni karavau tagane, se gunuva na dra ni koti?

14Mo cabora vua na Kalou na vakamolimoli; ka vakayacora na ka ko a vosa vavakini kina vei Koya sa Cecere sara:

15mo masuti au talega e na siga ni rarawa: kaʼu na vakabulai iko, ia ko na vakarokorokotaki au.

16Ia vei ira nai valavala ca, sa kaya na Kalou, A cava ko sa kitaka ni ko sa tukuna na noqu vunau, ka cavuta e gusumu na noqu veiyalayalati?

17Ni ko sa cata tiko nai vakavuvuli, ka sa biuta ki dakumu na noqu vosa.

18Ni ko a kunea na daubutako, ko a qai lomavata kaya, a sa votai vata kei ira na dauyalewa.

190 sa solia na gusumu ki na ka ca, a sa tulia na ka lasu na yamemu.

20O sa tiko ka vosacataki koya na tacimu; o sa kaseti koya na luve i tinamu.

21A ka o qo ko a kitaka, ia kaʼu a galu; ko a qai nanumi au meʼu vakataki iko sara: ia kaʼu na vunauci iko, ka tuva e matamu na nomui valavala ca o qo.

22Dou qai nanuma na ka o qo, oi kemudou sa guilecava na Kalou, deʼu sa dresulaki kemudou, ka sega e dua me vakabula.

23O koya sa cabora na vakavinavinaka sa vakarokorokotaki au: ia ko koya sa vakarautaka na nona sala kaʼu na vakaraitaka vua na bula sa mai vua na Kalou.