Meke 38 - AI VOLA TABU（FIJ1864）

Sa vakatusa na nona ca na tamata sa kila dina na yalona.A Meke i Tevita, me vakanananu ka kina.

1I JIOVA, kakua ni vunauci au e na nomu cudru: se yaviti au e na nomu cudru waqawaqa.

2Ni sa coba sara e lomaqu na nomu gasau, a sa bitaki au vakaukauwa na ligamu.

3Sa sega na tiki ni yagoqu sa bula e na vuku ni nomu cudru; sa sega na vakacegu e na suiqu e na vuku ni noqui valavala ca.

4Ni sa uasivi cake e na uluqu na noqu caka ca: me vaka nai colacola bibi kaʼu sa sega ni colata rawa.

5Sa boi ca ka tetela na noqu vidikoso e na vuku ni noqu lialia.

6Au sa rarawa sara; au sa vakalairoro vakalevu; au sa tagi lako e na siga ka bogi mai.

7Ni sa robo na toloqu e na mate vakasisila: a sa sega na tiki ni yagoqu sa bula.

8Au sa malumalumu ka musulaki sara: au a qoqolou ni sa daurarawa na yaloqu.

9I Jiova, sa tu e matamu na ka kecega kaʼu sa gadreva; a sa sega ni vuni vei iko na noqu vutugu.

10Sa ceguoca na lomaqu, sa lako tani na noqu kaukauwa: a rarama talega ni mataqu, sa takali vei au.

11A noqui tau kei na wekaqu era tu tani niʼu sa yaviti; ia na kai noqu era sa tu vakayawa.

12A ra virinoca nai cori ko ira sa qarai au meʼu mate: o ira talega sa qara na noqu ca era vosavakacacataki au, a ra vakasama na ka lasu e na tiki ni siga kecega.

13Ia koi au, kaʼu sa vaka na didivara, kaʼu tawa rogoca; ka vaka na galu sa tawa dalaga na gusuna.

14Ia kaʼu sa vaka e dua sa tawa rogo rawa, ka sa sega e na gusuna na veivunauci.

15Niʼu sa namaki iko ga, Jiova: o na rogoci au, Turaga noqu Kalou.

16Niʼu sa kaya, De ra rekitaki au: ia ni sa tidara na yavaqu, era sa vakalevui ira vei au.

17Niʼu sa voleka ni tu vakadua, a sa tu vakadua e mataqu na noqu rarawa.

18Niʼu na vakatusa noqui valavala ca; kaʼu na rere e na vuku ni noqu caka cala.

19Ni ra sa tamata bula na noqu meca, a ra sa kaukauwa: ia ko ira era cati au walega era le vuqa mai.

20O ira talega era kitaka na ca mei sau ni ka vinaka era noqu meca; e na vuku ni kaʼu sa muria na ka vinaka.

21Kakua ni biuti au, Jiova: noqu Kalou, kakua ni vakayawa vei au.

22Mo kusarawa me vukei au mai, Turaga na noqui Vakabula.