Meke 30 - AI VOLA TABU（FIJ1864）

A vakavinavinaka vua na Kalou e na vuku ni sa dauvakabulai ira na nona tamata.A Meke kei na Sere i Tevita ni sa curuma na Vale.

1AU na vakavinavinaka vei iko, Jiova, ni ko sa laveti au kicake; ka sa sega ni laivi ira na noqu meca me ra reki e na vukuqu.

2I Jiova noqu Kalou, kaʼu a tagi vei iko, ia ko sa vakabulai au.

3I Jiova, ko a tubera cake na yaloqu mai nai bulubulu; ko sa maroroya noqu bula, meʼu kakua ni lako sobu ki nai bulubulu.

4Dou meke vei Jiova, koi kemudou na nona tamata yalosavasava, ka vakavinavinaka ni dou nanuma na nona yalododonu.

5Ni sa cudru ka sa oti vakasauri; sa tu vata na bula kei na nona loloma; ena tiko na tagi kei na bogi; a sa ia ga e na mataka na marau.

6Ia niʼu a tiko vinaka kaʼu sa kaya, Kaʼu na sega tale ni vakayavalati.

7I Jiova, e na nomu loloma ko sa vakataudeitaka sara na noqu ulu-ni-vanua: ia ko sa vunia na matamu, kaʼu sa taqaya.

8Au na tagi vei iko, Jiova; kaʼu na cakava vei Jiova na noqu masumasu.

9A cava na betena na noqu dra, niʼu sa lako sobu ki nai bulubulu? Ena vakavinavinaka beka vei iko na kuvu-ni-soso? ena tukuna beka na nomu dina?

10Rogoca, Jiova, ka lomani au mai; vukei au mai, Jiova.

11O sa vukica vei au na noqu tagi me marau; o sa luvata, na noqui sulu taqarotu, ka vauci au e na rereki;

12me meke kina vei iko na yamequ; me kakua sara ni galu. I Jiova noqu Kalou, kaʼu na vakavinavinaka vei iko ka tawa mudu.