Meke 9 - AI VOLA TABU（FIJ1864）

A vakavinavinaka kei na vakabauta ni tamata yalododonu sa tiko vakararawa.Vua na Domo-ni-meke e na Muce-lapeni. A Meke i Tevita.

1AU na vakavinavinaka vei Jiova e na yaloqu kecega; au na tukuna kecega na nomu cakacaka e veivakidacalataki.

2Au na reki ka marautaki iko: au na meketaka na yacamu, o iko sa Cecere.

3Ni ra sa lesu kimuri na noqu meca, era na bale ka rusa mai na matamu.

4Ni ko sa kitaka e na vukuqu na ka dodonu kei na lewa; o sa tiko e nai tikotiko vakaturaga, ka sa ia na lewa dodonu.

5O sa vunauci ira na veimatanitu, o sa vakarusai koya na tamata ca; o sa quaraka laivi sara na yacadra ka tawa mudu.

6O iko na meca, sa mudu sara na veivakarusai: o a vaqeavutaka na veikoro; sa takali vata kei ira na nodra vakananumi.

7Ia ko Jiova, ena tu dei ga ka tawa mudu; sa vakarautaka ko koya na nonai tikotiko me ia na veilewai.

8Ena lewa na vuravura ko koya e na lewa dodonu; ena lewai ira na lewe ni veivanua e na yalododonu sara.

9Ena yaco ko Jiova me Uluvatu i koya sa vakararawataki, na uluvatu e na gauna ni veivakacacani.

10Era na vakararavi talega vei iko ko ira era sa kila na yacamu, ni ko sa sega ni biuti ira era sa vakasaqarai iko, Jiova.

11Dou meke vei Jiova, vei koya sa tiko mai Saioni: tukuna vei ira na tamata na nona cakacaka.

12Ni sa taroga ko koya nai sau ni dra, sa nanumi ira: sa sega ni guilecava na nodra tagi era sa yalomalumalumu.

13Mo yalololoma mai vei au, Jiova; raica na ka rarawa sa yaco vei au maivei ira era sa cati au, o iko ko sa laveti au cake mai na matamata-ni-koro ni mate:

14meʼu tukuna kina na ka kecega ko sa vakavinavinakataki kina e na matamata-ni-koro ni gonealewa ni Saioni: au na reki ni ko sa ia na veivakabulai.

15Sa sikalutu na veimatanitu ki nai keli era cakava: e na lawa era sa vunia sa cori kina na yavadra.

16Sa kilai ko Jiova e na lewa sa kitaka ko koya; sa coriti na tamata ca e na cakacaka ni ligana. Sela.

17Ena lako ki eli ko ira na tamata ca, na lewe ni veivanua kecega era sa guilecava na Kalou.

18Ni na sega ni guilecavi tikoga na tamata dravudravua: ena tawa rusa laivi na ka era namaka na tamata yalomalumalumu.

19Tu cake, Jiova; me kakua ni gumatua na tamata: me ra lewai e matamu ko ira na veimatanitu.

20I Jiova, mo vakarerei ira; me ra kilai ira na lewe ni veivanua ni ra sa tamata wa-lega. Sela.