Ai Vola Kei Jope 33 - AI VOLA TABU（FIJ1864）

Sa vakarota vei Jope ko Iliu me vakarogoca, 1-7. Sa vunauci Jope e na vuku ni nona vosa e so, 8-13. Sa dau vakatavulici ira na tamata na Kalou me ra veivutuni, 14-30. Sa vakarota tale vei Jope me vakarogoca, 31-33.

1O KOYA o qo mo rogoca mada kina, Jope, na noqu vunau, ka vakarorogo ki na noqu vosa kecega.

2Raica, kaʼu sa qai dalaga na gusuqu, sa vosa oti e gusuqu na yamequ.

3A noqu vosa na ka dodonu ni lomaqu: ia na tebenigusuqu ena cavuta vakamacala na vuku.

4Sa buli au na Yalo ni Kalou, a sa solia vei au na bula na cegu i Koya sa Kaukauwa.

5Kevaka ko sa vosa tale rawa vei au, mo tuva vakavinaka na nomu vosa e mataqu, mo tu cake.

6Raica, kaʼu sa vakataki iko e na mata ni Kalou: oi au talega, kaʼu sa buli e na qele.

7Raica, ena sega ni vakarerei iko na noqu rerevaki, ena sega talega ni bitaki iko na ligaqu.

8E dina ko sa vosa oti e na daligaqu, kaʼu sa rogoca talega na domo ni nomu vosa, sa vakane,

9Au sa savasava ka tawai valavala ca, au sa tawa cala; a sa sega na ka tawa dodonu vei au;

10raica, sa dauqara ko koya na ka meʼu ca kina, sa nanumi au meʼu nona meca;

11sa vauca na yavaqu e nai vesu kau, sa vakaraica na noqui lakolako kecega.

12Raica, e na ka o qo ko sa tawa dodonu: kaʼu na vakatakila vei iko, ni sa levu na Kalou, ka lailai na tamata.

13A cava ko sa veivala kaya kina? ni sa tawa tukuni koya e na vuku ni dua na nonai valavala.

14Ni sa vosa vakadua na Kalou, io, ka vakarua, a ra sa sega ni kila na tamata.

15E na tadra, e na raivotu e na bogi, ni sa lutuki ira na tamata na moce lutu, ni ra sa moce koto e nodrai mocemoce:

16sa qai basuka ko koya na daliga ni tamata, ka vakadeitaka nai vakavuvuli vei ira,

17me vakadaroya kina nona cakacaka na tamata, ka tarova na tamata me kakua ni dokai koya.

18Sa tarova na yalona me kakua ni lako ki na rusa, kei na yagona me kakua ni mate e nai seleiwau.

19Sa vakanakuitataki talega ko koya e na rarawa e na nonai mocemoce, kei na suina e vuqa e na yaluma levu:

20a sa cata kina na kakana na lomana, kei na yalona na kakana vinaka.

21Sa uru na lewena, me tawa raici rawa; ia na suina sa dautawa votu, sa qai votu mai.

22Ia na yalona sa toro voleka ki nai bulubulu, kei na nona bula vei ira na dauveivakarusai.

23Kevaka sa tu e dua nai talatala, nai vakavuvuli, e lewe dua ga vei ira na lewe udolu, me tukuna vua na tamata na yalododonu i Koya:

24ena qai yalololoma vua ko koya, ka kaya, Me vakabulai mada ko koya, me kakua ni lako sobu ki nai bulubulu; au sa kunea na kenai soro.

25Ena qai vou mai na lewena me vaka ni sa gone: ena vuki me cauravou tale:

26ena masu vua na Kalou, ena yalololoma vua ko koya: ia ena raica na matana ka reki: ni na solia vua na tamata me vaka na nona caka dodonu.

27Sa raici ira na tamata ko koya, ia kevaka e dua sa kaya, Au sai valavala ca, ka vakacalataka na ka e dodonu, a sa tawa yaga vei au;

28ena vakabulai koya ko koya me kakua ni lako sobu ki nai bulubulu, ia ena kunea na rarama ni bula.

29Raica, na ka kecega o qo sa daucakava na Kalou vei ira na tamata,

30me vakalesui koya tale mai nai bulubulu, me vakararamataki talega e na nodra rarama na bula.

31Mo nanuma, Jope, ka vakarorogo vei au: mo tiko lo, kaʼu na qai vosa tiko.

32Kevaka sa dua na nomu vosa, mo tauca mai vei au: mo vosa, niʼu sa via vakadonui iko.

33Kevaka e segai, mo vakarorogo vei au: mo tiko lo, kaʼu na qai vakavulica na vuku vei iko.