Ai Vola Kei Esiteri 3 - AI VOLA TABU（FIJ1864）

Sa cudru ko Amani; ka sa rawata nai vakaro me vakawayalitaki ko ira na Jiu.

1IA ni sa oti na veika o qo sa qai vakalevutaki Amani na luve i Mitaca, na luve i Ekaki, ko Easiverosi na tui, a sa laveti koya, ka vakatikora na nonai tikotiko me cecere cake vei ira kecega na turaga era tiko vata kaya.

2A ra sa cuva ka rokovi Amani ko ira kece na tamata ni tui, e na nona matamata-ni-koro na tui: ni sa vakakina nai vakaro ni tui e na vukuna. A sa sega ni cuva ko Moritikei, se vakarokoroko.

3Era sa qai kaya vei Moritikei ko ira na nona tamata na tui era sa tiko e na matamata-ni-koro ni tui, A cava ko sa vakacacataka kina na sau ni tui?

4Ia ni ra sa vosa vua e na veisiga, a sa sega ni vakarorogo vei ira ko koya, era sa qai tukuna vei Amani, me ra kila se na yaco na ka e kitaka ko Moritikei, se segai: ni sa tukuna oti vei ira ko koya ni sa Jiu ko koya.

5Ia ni sa kunea ko Amani ni sa sega ni cuva ko Moritikei, se vakarokoroko vua, sa qai cudru vakalevu ko Amani.

6A sa nanuma me ka wale me vakamatei Moritikei duaduaga, ni sa tukuni oti vua na kawa i Moritikei: o koya sa vakasaqara kina ko Amani me vakarusai ira kecega na Jiu e na matanitu taucoko i Easiverosi, io ko ira na kawa i Moritikei.

7E nai matai ni vula, o qori na vula ko Nisani, e nai katinikarua ni yabaki i Easiverosi na tui, sa kitaki na Puri, o qori na veidigidigi, e na mata i Amani e na veisiga, kei na veivula, me yacova nai katinikarua, o qori na vula ko Etari.

8A sa kaya ko Amani vua na tui ko Easiverosi, Sa dua na mataqali era sa dui veiseyaki ka dui tikotiko kei ira na tamata, e na veiqali kecega ni nomu matanitu; a sa dua tani na nodra vunau e na nodra na tamata kecega; era sa sega talega ni vakabauta na nona veivunau na tui: o koya sa sega kina ni yaga vua na tui me vosoti ira.

9Kevaka sa vinakata ko na tui, me volai mada me ra vakarusai: ia koi au, au na solia o dua na oba na taledi siliva ki na ligadra era sa lesi me vakayacora na ka o qo, ka me kau ki na nona vale ni yau na tui.

10A sa cavuta mai na mama mai na ligana ko na tui, ka solia vei Amani na luve i Mitaca, na luve i Ekaki, na nodra meca na Jiu.

11A sa kaya na tui vei Amani, Sa soli vei iko na siliva, ko ira talega na tamata, mo kitaka vei ira na ka e vinaka vei iko.

12Era sa qai kacivi ko ira na nona vu-ni-vola na tui, e nai katinikatolu ni si ga ni matai ni vula, a sa volai kece, me vaka na vosa kece i Amani, vei ira na nona tamata vakaturaga na tui, kei ira na turaga ni qali kecega, kei ira era lewa na tamata kecega e na veiqali, me vaka na kena mata-ni-vola, vei ira talega na mataqali kecega e na nodra vosa; sa volai e na yaca ni tui ko Easiverosi, a sa tabai na kena drega e na nona mama na tui.

13A sa kauta na veivota ko iratou na tamata e daucicitaka nai vola ki na nona qali kecega na tui, ka me vakarusai ira na Jiu, ka vakamatea, ka vakaoti ira kecega, o ira na gone kei ira na qase, na gone lalai kei ira na alewa, e na siga e dua, e nai katinikatolu ni siga ni kenai katinikarua ni vula, a ya na vula ko Etari, me taura talega na nodra yau me nodrai toki ni valu.

14Sa tukuni vei ira na tamata kecega nai vola, ni sa laveti me sau, me soli e na veiqali kecega, me ra vakarau tu ka waraka na siga ko ya.

15Era sa qai lako yani na tamata era daucicitaka nai vola, ni ra sa vakariritaki e na vosa ni tui, a sa soli na vunau mai Susani na koro vakaturaga. A rau sa tiko sobu me gunu ko na tui kei Amani; a sa taqaya ga na koro ko Susani.