Ai Vola I Esira 6 - AI VOLA TABU（FIJ1864）

Sa vakarota ko iratou na tui Perisia me tara na vale ni soro, a sa vakaoti, a sa curumi, ka ia na solevu ni lako-sivia.

1SA qai vakarota ko Tario na tui, a sa ia na vakasaqaqara e na vale ni vola vivigi, sa maroroi tu kina na ka talei mai Papiloni.

2A sa kune e dua nai vola vivigi mai Ekimica, e na vale vakaturaga mai na vanua ko Mitia, sa volai kina na ka me nanumi, a sa vakaoqo:

3E nai matai ni yabaki i Koresi na tui, sa vakarota ko Koresi na tui o na vuku ni vale ni Kalou mai Jerusalemi, Me tara na vale o qori, na yasana ka vakacabori kina nai soro, ia me viritaki me kaukauwa na kena yavu: a kena cecere me dua na drau ka ruasagavulu na caga, na kena raraba me dua na drau ka ruasagavulu na caga;

4me tolu na yatu vatu lelevu, kei na yatu kau vou: ia me vakaivolitaki mai na vale ni tui:

5ia me vakasukataki tale na veiyaya koula kei na siliva ni vale ni Kalou, a ya ka kauta ko Nipukatinesari mai na vale mai Jerusalemi, ka kauta ki Papiloni; ia me kauti tale ki na vale ni Kalou mai Jerusalemi, ki na nodra yasana, ka me viritu e na vale ni Kalou.

6Ia, ko iko Tatinei, na turaga mai tai kadua, kei Sicari-posinei, kei ira na nomudraui tokani na Efarisacikai, a ya mai tai kadua ni uciwai, dou tiko vakayawa:

7mo dou laiva mada na cakacaka ni vale o qo ni Kalou; me tara ga na vale o qo ni Kalou e na nona yasana, ko na nodra turaga na Jiu, kei ira na nodra qase na Jiu.

8Au sa rotaka talega na ka mo dou cakava vei ira na nodra qase na Jiu, me tara kina na vale o qo ni Kalou: ka me soli nai voli vei ira na tamata o qo mai na nona yau na tui, ia mai nai vakacavacava mai tai kadua, me ra kakua ni tarovi.

9Kei na ka era sa dravudravua kina, na luve ni karavau e so, kei na sipi tagane e so, kei na lami e so, me veisoro kama vua na Kalou kei lomalagi, na witi, na masima, na waini, kei na waiwai, me vaka na ka era lesia na bete era tiko mai Jerusalemi, me soli vei ira e na veisiga, me tawa mudu:

10me ra vakacabora na veisoro e boivinaka vua na Kalou ni lomalagi, ka masulaka me bula na tui, kei iratou na luvena.

11Au sa vakarota talega, e na vukuna e dua sa vakatanitaka na vosa o qo, me basuki na kau mai na nona vale, ka vakaduri, me vakalilici kina ko koya; ia mei sovasova ni benu na nona vale e na vuku ni ka o qo.

12Ia na Kalou, ko koya sa vakatikora maikea na yacana, me vakarusai ira kecega na tui kei ira na tamata, era dodoka na ligadra me vakatanitaka ka vakarusa na vale o qo ni Kalou mai Jerusalemi. Oi au ko Tario, au sa vakarota; me caka vakasauri.

13Ia ko Tatinei, na turaga e na tai o qo ni uciwai, kei Sicari-posinei, kei ira na nodraui tokani, era sa kitaka vakasauri na ka ka talaki kina ko Tario na tui.

14A sa tara ko ira na nodra qase na Jiu, ka cakacaka yaco, ni sa parofisai ko Akei na parofita, kei Sikariya na luve i Ito. A ra sa tara tiko, ka vakaotia, me vaka nai vakaro ni nodra Kalou na Isireli, ka vaka nai vakaro i Koresi, kei Tario, kei Aritasasita na tui Perisia.

15A sa vakaoti na vale o qo e nai katolu ni siga ni vula ko Etari, a ya e nai kaono ni yabaki ni lewa i Tario na tui.

16A sa ia na solevu ni curuma na vale o qo ni Kalou e na marau, ko ira na luve i Isireli, ko ira na bete, kei ira na Levi, kei ira na nodra vo ka vakabobulataki,

17a sa vakacabora, ni sa curumi na vale o qo ni Kalou, e dua na drau na karavau, e rua na drau na sipi tagane, e va na drau na lami; kei na nodrai soro ni valavala ca e na vukudra kecega na Isireli, e tinikarua na koti tagane, me vaka nai wiliwili ni nodra yavusa na Isireli.

18A ra sa vakatikori ira na bete e na nodra veiwasewase, kei ira na Levi e na nodrai tavi, ki na cakacaka vua na Kalou, a ya mai Jerusalemi; me vaka sa volai e nai vola i Mosese.

19A ra sa ia na solevu ni lako-sivia ko ira ka vakabobulataki e nai katinikava ni siga ni matai ni vula.

20Ni ra sa vakasavasavataki vata ko ira na bete kei ira na Levi, era sa savasava kecega, ka vakamatea nai soro ni lako-sivia e na vukudra kece era a vakabobulataki, e na vukudra talega na wekadra na bete, e na vukudra talega.

21A sa kania ko ira na luve i Isireli, era sa lako tale mai na vakabobulataki, kei ira kece era sa tawasei ira mai na nodra dukadukali na lewe ni vanua, me ra qarai Jiova na nodra Kalou na Isireli,

22a ra sa vakabauta e na marau na solevu ni madrai sa tawa vakaleveni, ka bogi vitu: ni sa vakamarautaki ira ko Jiova, ka vagolea na lomana na tui Asiria vei ira, me vakaukauwataka na ligadra e na cakacaka ni vale ni Kalou, na nodra Kalou na Isireli.