1IA e na kenai kaciwa ni yabaki ni sa tui tiko, e na kenai katini ni vula, e na kenai katini ni siga ni vula, sa lako mai me kabai Jerusalemi ko Nipukatinesari, na tui Papiloni, o koya kei ira kece na nonai valu; a ra sa laʼki tiko vakaivalu maikina, ka tara na veivale kaukauwa ni valu me volita.
2A sa buku tiko na druadrua ni koro, ka yacova na kenai katinikadua ni yabaki i Sitikiva na tui.
3E na kenai kaciwa ni siga ni vula, sa qai rawa na koro na viakana, a sa sega na kakana vei ira na lewe ni vanua.
4A sa basuki na koro, a sa dro e na bogi ko ira kecega na tamatai valu, e na sala ni matamata-ni-koro, e na macawa ni bai e rua, a ya mai na nona were na tui, a sa lako yani e na sala vaka ki na buca: (ia ko ira na kai Kalitea, era sa tiko vakavolivolita na koro).
5A sa cicimuria na tui na nodrai valu na kai Kalitea, ka vauci koya e na buca mai Jeriko: a ra sa vakasesei tani vua ko ira na nonai valu taucoko.
6A ra sa taura na tui, ka kauta vei tui Papiloni ki Ripila; a ra sa lewai koya.
7A ra sa vakamatei iratou na luve i Sitikiya e matana, a sa vakabokoca na mata ruarua i Sitikiya, ka vesuki koya e nai vesu parasa, ka kauta ki Papiloni.
8Ia e na kenai kalima ni vula, e na kenai kavitu ni siga ni vula, ko ya na kenai katinikaciwa ni yabaki ni tui, ko Nipukatinesari, na tui Papiloni, sa qai lako mai ki Jerusalemi ko Nipusaretani, a turaga ni valu i vakatawa, e dua na nona tamata na tui Papiloni:
9a sa visa na vale i Jiova, kei na vale ni tui; a sa visa e na buka na vale kecega mai Jerusalemi, io na vale lelevu kecega.
10A sa talaraka sobu na bai sa voliti Jerusalemi, ko ira kecega na nodrai valu na kai Kalitea era tiko kaya na turaga ni valu i vakatawa.
11Ia ko ira na kena vo ni tamata era vo tiko e loma ni koro, kei ira era dro vei tui Papiloni, kei ira sa vo vei ira na lewe vuqa, sa kauti ira vakabobula yani ko Nipusaretani na turaga ni valu i vakatawa.
12Ia ko koya na turaga ni valu i vakatawa, sa laivi ira me ra tikoga na kaisi ni vanua, me ra wereca na veivaini kei na veiwere.
13Ia na veiduru parasa ka tu e na vale i Jiova, kei na veitutu ni deredere, kei na sedre-wasawasa parasa sa tu e na vale i Jiova, era sa vorolaka na kai Kalitea, ka kauta na kedratou parasa ki Papiloni.
14Ia na veikuro, kei na veisivi ni dravu, kei na veikoti-ni-cina, kei na veitaki taki, kei nai yaya parasa kecega era sa daucakacaka kina, era sa kauta tani.
15A sa kauta tani ko na turaga ni valu i vakatawa na veidari ni de-ni-buka, kei na veibilo me kau kina na dra me kureitaki, o qori sa dui koula kei na siliva.
16Na duru e rua, na sedre-wasawasa e dua, kei na veitutu ni deredere, o qori ka cakava ko Solomoni ki na vale i Jiova; sa sega ni kilai na kena bibi na parasa ni yaya kecega o qo.
17Na kena cecere e dua na duru sa tolusagavulu ka ono na caga, a sa parasa na domodomo sa tu e delana: ia na kena balavu e dua na domodomo sa ono na caga; kei na sinucodo sa muloci, kei nai ukuuku e vaka na vua ni kau sa viviraka na domodomo, sa parasa kecega: a sa tauvata kei na ka o qo na duru kadua e na sinucodo sa muloci.
18Ia na turaga ni valu i vakatawa, sa tauri Siraya na bete levu, kei Sifaniya nai karua ni bete, kei iratou nai vakatawa ni katuba e lewe tolu:
19ia vei ira sa tiko e na koro sa taura ko koya e dua na turaga, o koya sa lesi me lewai ira na tamatai valu, kei na lewe lima vei ira na tamata era dautiko e na mata ni tui, era sa kune e na koro, kei koya na nona tamata dauvolavola na turaga ni valu, o koya ka dauvakasoqoni ira vata na lewe ni vanua, kei ira na tamata e lewe onosagavulu vei ira na lewe ni vanua era sa kune e loma ni koro:
20a sa kauti ira o qo ko Nipusaretani na turaga ni valu i vakatawa, a sa kauti ira vua na tui Papiloni ki Ripila:
21a sa mokuti ira ko tui Papiloni, ka vakamatei ira mai Ripila e na vanua ko Emaci. A sa kauti vakabobula tani ko ira na Juta mai na nodra vanua.
22IA ko ira na tamata era vo tiko e na vanua nei Juta, o ira ka laiva ko Nipukatinesari na tui Papiloni me ra tiko, sa lesi Kitaliya na luve i Eiikami na luve i Safani ko koya, me turaga vei ira.
23Ia ko ira kecega na turaga ni veimataivalu, ko ira kei ira na tamata, ni ra sa rogoca ni sa lesi Kitaliya me turaga ko tui Papiloni, era sa lako mai kivei Kitaliya ki Misipa, io ko Isimeeli na luve i Nicaniya, kei Yoanani na luve i Karia, kei Siraya na luve i Tanumeci na kai Nitofa, kei Yeesaniya na luvena e dua na kai Meeka, io ko iratou kei ira na nodratou tamata.
24A sa vosavavakini vei iratou ko Kitaliya, vei ira talega na nodratou tamata, ka kaya vei ira, Dou kakua ni rerevaki iratou na nodrai talatala na kai Kalitea, dou tikoga e na vanua, ka qaravi koya na tui Papiloni; ia dou na vinaka ga.
25Ia e na kenai kavitu ni vula sa lako ko Isimeeli na luve i Nicaniya na luve i Ilisama, e dua e na kawa ni tui kei iratou kaya na tamata e lewe tini, a ratou sa mokuti Kitaliya, a sa mate kina, kei ira na kai Jutia kei ira na kai Kalitea era tiko kaya mai Misipa.
26A sa tu cake ko ira kecega na tamata, ko ira na lalai kei ira na lelevu, kei ira na turaga ni veimataivalu, a ra sa lako ki Ijipita: ni ra sa rere e na vukudra na kai Kalitea.
27IA ni sa bobula oti ko Yioyakini na tui Juta ka yabaki tolusagavulu ka vitu, e na kenai katinikarua ni vula, e na kenai karuasagavulu ka vitu ni siga ni vula, sa qai sereki Yioyakini na tui Juta mai na vale ni veivesu ko Ivili-mirotaki na tui Papiloni, e na yabaki sa mai tui kina;
28a sa vosa vinaka vua, a sa vakatikora nai tikotiko vakaturaga i koya me liu e na nodrai tikotiko vakaturaga na tui era tiko kaya mai Papiloni;
29a sa kauta tani na nonai sulu ni vale ni veivesu: a sa kana tikoga ko koya e na mata i koya o na veisiga kecega ni nona bula.
30A sa votai tikoga vua mai na tui na nonai votavota, nai votavota ni siga yadua e na kena siga, e na veisiga kecega ni nona bula.
Who We AreWhat We EelieveWhat We Do
2025 by iamachristian.org,Inc All rights reserved.
