1SA qai ia na meke e na siga ko ya ko Tipora kei Paraki na luve i Epinoami, ni ka kaya,
2E na vuku ni sa liutaki ira na Isireli ko ira na turaga, e na vuku ni sa gu ko ira na tamata, dou vakavinavinaka vei Jiova.
3Dou rogoca, na tui; dou vakatu daligamudou, na turaga; au na meke koi au vei Jiova; au na meke vei Jiova na Kalou nei Isireli.
4I Jiova, ni ko a lako tani mai Seira, ni ko a lako tani vakaturaga mai na vanua ko Itomi, sa tavaki ko vuravura, a sa vaka-tautau ko lomalagi, sa vakatauca talega na uca na veio.
5Sa waicala na veiulu-ni-vanua e na mata i Jiova, io, na Sinei ko ya e na mata i Jiova na Kalou nei Isireli.
6E na gauna i Samikari na luve i Anaci, o na gauna i Yaeli, sa-sega mai na veisalatu, a ra lako e na veisala takelo na dauveilakoyaki e na veigau-ni-sala.
7Sa sega mai ko ira sa lewa e Isireli, sa ra sega mai, ka yacova na noqu tubu, koi au ko Tipora, ka yacova na noqu tubu me tina e Isireli.
8Era digia e so na kalou vou; sa qai kabati na matamata-ni-koro: sa kune li e dua nai sasabai se moto vei ira na oba vakava ni Isireli?
9Au sa lomani ira era sa rotaki ira na Isireli, o ira sa gu maivei ira na tamata. Dou vakavinavinaka vei Jiova.
10Dou vakanananu, oi kemudou sa dauvodo voli e na asa vulavula, oi kemudou sa dautiko me ia na veilewai, oi kemudou talega sa daulako va na sala;
11ni sa tawa rorogo na domodra na daubutako e na tikina sa dautaki kina na wai; maikeka me ra veitu-kutukunitaka na cakacaka loloma i Jiova, io, na nona cakacaka loloma sa lewai ira na Isireli: me ra qai lako sobu ki na vei-matamata-ni-koro na tamata i Jiova.
12Yadra mai, yadra mai, i Tipora: yadra mai, yadra mai, lagata na meke: mo ia, i Paraki, ka vakabobulataki ira na nomu bobula, ko iko na luve i Epinoami.
13E na gauna ko ya, sa lako sobu mai ko ira na turaga sa vo: sa lako sobu mai vei au ko ira na tamata i Jiova vata kei ira na qaqa:
14maivei ira na Ifireimi, era sa tiko mai Amaleki; sa muri kemudou, ko ira na Penijamini, e na kedra maliwa na nomudou tamata: maivei ira na Mekiri, era sa lako sobu na dauvakania; ia maivei ira na Sepuloni, ko ira sa taura nai titoko i koya sa dauia na wiliwili.
15Ia sa to vata kei Tipora ko ira na noqu turaga maivei ira na Isakari; io ko ira na Isakari, kei Paraki talega: sa talai ko ira me muri koya ki na buca. Mai na nodra veisoniwai na Rupeni, sa levu na veinaki ni lomadra.
16O a tiko e na cava mai na bai ni sipi, mo rogoca na tagi ni qele ni sipi? Mai na nodra veisoniwai na Rupeni, sa levu na veibose ni lomadra.
17Sa tiko mai tai kadua ni Joritani ko ira na Kiliati: a sa tiko e na cava e na veiwaqa ko ira na Tani? sa tiko mai na matasawa ko ira na Aseri, ka tiko wele e na nodra veitoba.
18Era sa tamata sa douvaka na mate ko ira na Sepuloni, kei ira na Nafitali, e na veitiki-ni-vanua cecere.
19Era sa lako mai na tui, era sa vala, era sa qai vala na tui Kenani mai Teenaki mai na wai mai Mikito; sa sega nai lavo era sa kauta me kenai sau.
20Sa so mai lomalagi sa vala; era sa veivala kei Sisira na kalokalo e na nodra veisala.
21Sa daveni ira yani na uciwai ko Kisoni, na uciwai makawa ko ya, na uciwai ko Kisoni. O iko na yaloqu, ko sa buturaka sobu na kaukauwa.
22Sa qai mavoa sara na ququ ni ose, ni ra sa cici kusakusa, ni ra sa cici kusakusa ko ira na nodra qaqa.
23Dou kaya, Me rusa ko Merosi, sa kaya na Agilose i Jiova: Dou kaya, Me rusa sara ko ira na lewena; e na vuku ni ra sa sega ni lako mai me veivuke kei Jiova, me veivuke kei Jiova me veivala kei ira na qaqa.
24Sa na kalougata vei ira na alewa ko Yaeli na wati i Eperi na kai Kenai, sa kalougata vei ira na alewa era sa tiko e na vale gatu:
25sa kerei vua na wai; sa solia ko koya na wai-ni-sucu; sa kauta mai ko koya na kena uro e na bilo vakaturaga:
26sa dodoka na ligana ki nai vakadei, kei na ligana i matau ki na nodrai tukituki na matai; a sa tukilaki Sisira, ka sovuta na uluna, ni sa coka me basika na nona kanavalavala.
27E na maliwa ni yavana sa cuva ko koya, sa bale, sa koto no: e na maliwa ni yavana sa cuva ko koya, sa bale: e na tikina ka cuva kina, sa bale mate kina.
28Sa iro yani e na katuba lailai ko koya na tina i Sisira, ka kaci e nai sogo cicila, Sa berabera me lako mai e na cava na nona vale-vodoki? sa berabera e na cava na yavadra na nona veivale-vodoki?
29Era sa kaya vua ko ira na nona marama vuku, sa kaya ko koya talega,
30Era sa sega li ni kunea nai toki ni valu? era sa sega li ni vota? ki na tamata yadua e dua, io e rua na gonealewa; kivei Sisira e dua nai toki ni valu veivolavolai, e dua nai toki ni valu veivolavolai a ya sa culacula, se sa takivei-cula, me taubeni kina ko ira sa rawai?
31Me rusa vakakina, i Jiova, na nomu meca kecega: ia ko ira era sa lomani koya me ra vaka ga na mata-ni-siga ni sa lako cake e na nona kaukauwa.
A sa cegu na vanua ka yabaki vasagavulu.
Who We AreWhat We EelieveWhat We Do
2025 by iamachristian.org,Inc All rights reserved.
