1IA ni sa rogoca ko Etoni-seteki na tui Jerusalema ni sa kabati Ai oti ko Josua, a sa vaqeavutaka; (me vaka ni ka kitaki Jeriko ko koya kei na kena tui, sa kitaki Ai vakakina kei na kena tui;) ka ra sa sauvinaka oti na kai Kipioni kei na Isireli, ka ra tiko vata;
2era sa qai rere vakalevu, e na vuku ni sa koro levu sara ko Kipioni, me vaka e dua na koro vakaturaga, io sa levu cake ka lailai sobu ko Ai, ka ni sa qaqa ko ira kece na kena tamata.
3A sa talaki ko Etoni-seteki na tui Jerusalema vei Oami na tui Epironi, kei Pirami na tui Yarimuci, kei Yafia na tui Lakisi, kei Tipiri na tui Ekiloni, ka kaya,
4Dou lako cake mai vei au, ka vukei au, me da mokuti Kipioni, e na vuku ni sa sauvinaka ko ya kei Josua kei ira na luve i Isireli.
5A ratou sa soqoni vata ko iratou na nodra tui e lima na luve i Amori, ko tui Jerusalema, ko tui Epironi, ko tui Yarimuci, ko tui Lakisi, kei tui Ekiloni, a ra sa lako cake, ko iratou kei na nodratoui valu kecega, ka laʼki tiko me donui Kipioni, ka veivala kaya.
6A ra sa talaki na kai Kipioni vei Josua ki nai tikotiko mai Kilikali, ka kaya, Me kakua ni berabera na ligamu vei keimami na nomu tamata; mo tei lako kusarawa cake mai vei keimami, ka vakabulai keimami, ka vukei keimami, ni sa soqo vata mai vei keimami na nodra tui kece na luve i Amori era sa tiko mai na ulu-ni-vanua.
7A sa cabe cake mai Kilikali ko Josua, ko koya, kei ira vata kaya na tamatai valu kece, kei na tamatai valu qaqa kecega.
8A sa kaya vei Josua ko Jiova, Mo kakua ni rerevaki ira; niʼu sa soli ira ki na ligamu; ena sega e dua vei ira me tu e matamu.
9A sa lako vakasauri vei ira ko Josua, ni sa lako cake mai Kilikali e na bogi taucoko.
10A sa vakagucataki ira ko Jiova e na matadra na Isireli, a ra sa mokuti ira kina e na veiravu levu mai Kipioni, ka cemuri ira e na sala sa lako cake ki Peci-oroni, ka mokuti ira tiko ka yaco ki Aseka kei Maketa.
11Ia ni ra sa dro tiko e na matadra na Isireli, e na sala sa lako sobu ki Peci-oroni, ka yaco ki Aseka, sa vakatauca tiko vei ira ko Jiova e so na vatu lelevu mai lomalagi, a ra sa mate kina: era sa lewe levu ka mate e na veivatu ni uca-cevata, a ra lewe lailai era vakamatea na luve i Isireli e nai seleiwau.
12Ia e na siga ko ya ni sa soli ira na luve i Amori e na matadra na luve i Isireli ko Jiova, sa qai vosa vei Jiova ko Josua, ka kaya e na matadra na Isireli, I Mata-ni-siga, mo tei cegu tu mada mai Kipioni, kei iko, i Vula, mai na buca nei Eyaloni.
13A sa cegu tu na mata-ni-siga, a sa tu vakadua na vula, me ra cudruvaki ira mada eliu ko ira na tamata vei ira na nodra meca. Sa volai vakaoqo e nai vola i Yeseri, ne: A sa tu vakadua na mata-ni-siga mai na loma ni lagi, ka tawa kusarawa me laʼki dromu, ena siga taucoko?
14A sa sega eliu se emuri me tauvata kei na siga ko ya, sa vakarorogo kina ko Jiova ki na vosa ni tamata: ni sa totaki ira na Isireli ko Jiova.
15A sa lesu ko Josua, kei ira vata kaya na Isireli kecega, ki nai tikotiko mai Kilikali.
16A sa dro ko iratou na tui e lima ko ya, ka vuni e na qara-vatu mai Maketa.
17A sa tukuni mai vakaoqo vei Josua, Sa kunei na tui e lima eratou a vuni e na qara-vatu mai Maketa.
18A sa kaya ko Josua, Dou vaqiqica e so na vatu lelevu ki na gusu ni qara-vatu, ka lesia kina e so na tamata me vakatawai iratou:
19ia dou kakua ni berabera; dou tei cicivi ira ga na nomudou meca, ka mokuti ira sa kenai murimuri; kakua ni laivi ira me ra curuma na nodra veikoro, ni sa soli ira ki na ligamudou ko Jiova na nomudou Kalou.
20Ia ni sa oti na nodra mokuti ira ko Josua kei ira na luve i Isireli e na veiravu levu sara, ka me ra oti mada, sa ra qai laʼki curuma e so na koro kaukauwa ko ira na kedra vo.
21A ra lesu e na vakacegu na tamata kecega ki nai tikotiko kivei Josua mai Maketa: sa sega e vakayavalata na gusuna me vosa vakaca vei ira na luve i Isireli.
22A sa kaya ko Josua, Dou dolava na gusu ni qara-vatu, ka kauti iratou mai vei au kitautuba mai na loma ni qara-vatu na tui e lima ko ya.
23A ra sa kitaka vakakina, ka kauti iratou mai vua mai na loma ni qara-vatu na tui e lima ko ya, ko tui Jerusalema, ko tui Epironi, ko tui Yarimuci, ko tui Lakisi, ko tui Ekiloni.
24Ia ni ra sa kauti iratou na tui ko ya mai kitautuba vei Josua, sa qai kacivi ira mai kecega na Isireli ko Josua, a sa kaya vei ira na nodra turaga na tamatai valu era sa lako kaya, Dou toro mai, vaca e na yavamudou na domodratou na tui o qo. A ra sa toro mai, ka vaca e na yavadra na domodratou.
25A sa kaya vei ira ko Josua, Dou kakua ni rere, se yalolailai, dou kaukauwa ka qaqa: ni na cakava vakaoqo ko Jiova vei ira na nomudou meca kecega dou na veivala kaya.
26A sa oti sa qai mokuti iratou ko Josua, ka vakamatei iratou, ka vakarubeci iratou e na kau e lima: a ratou sa rube tu e na kau ka yacova na yakavi.
27Ia ni sa laʼki dromu na mata-ni-siga, sa vakarota ko Josua, a ra sa kevutaki iratou mai na kau, ka biuti iratou ki na qara-vatu eratou a vuni kina, ka binia e na gusu ni qara-vatu e so na vatu lelevu, sa tu kina ka yacova na siga o qo.
28A sa kabati Maketa ko Josua e na siga ko ya, ka yavita e na bati ni seleiwau, ka vakamatea sara na kena tui, o ira, kei na tamata kecega sa tiko kina; sa sega ni laiva e dua me vo tu kina: a sa kitaka ko koya na tui Maketa me vaka ka kitaka na tui Jeriko.
29A sa lako tani e Maketa ko Josua, kei ira vata kaya na Isireli kecega, ki Lipina, ka veivala kei Lipina:
30ia o qori talega sa solia ko Jiova, kei na kena tui, ki na ligadra na Isireli; a ra sa yavita e na bati ni seleiwau, kei na tamata kecega sa tiko kina; sa sega ni laiva e dua me vo tu kina; a sa kitaka ko koya na kena tui me vaka ka kitaka na tui Jeriko.
31A sa lako tani e Lipina ko Josua, kei ira vata kaya na Isireli kecega, ki Lakisi, ka tiko vakaivalu kina, ka veivala kaya:
32a sa soli Lakisi ko Jiova ki na ligadra na Isireli; a ra sa kabata e na kenai karua ni siga, ka yavita e na bati ni seleiwau, kei na tamata kecega sa tiko kina, me vaka na ka kece era a kitaki Lipina kina.
33Sa qai lako cake ko Orami na tui Keseri me vukei Lakisi; a sa mokuti koya kei na nona tamata ko Josua, ka tawa laiva e dua me vo tu vua.
34A sa lako tani e Lakisi ko Josua, kei ira vata kaya na Isireli kecega, ki Ekiloni, ka tiko vakaivalu kina, ka veivala kaya:
35a ra sa kabata e na siga ko ya, ka yavita e na bati ni seleiwau, ia na tamata kecega sa tiko kina sa vakamatea sara ko koya e na siga ko ya, me vaka na ka kecega ka kitaki Lakisi kina.
36A sa lako cake mai Ekiloni ko Josua, kei ira vata kaya na Isireli kecega, ki Epironi; a ra sa veivala kaya:
37a ra sa kabata, ka yavita e na bati ni seleiwau, kei na kena tui, kei na kena koro kece, kei na tamata kecega sa tiko kina; sa sega ni laiva ko koya e dua me vo tu kina; a sa vakarusa sara, kei na tamata kecega sa tiko kina, me vaka na ka kece ka kitaki Ekiloni kina.
38A sa lesu mai ko Josua, kei ira vata kaya na Isireli kecega, ki Tipiri, ka veivala kaya:
39a sa kabata ko koya, a ra sa yavita e na bati ni seleiwau na kena tui, kei na kena koro kecega; a ra sa vakamatea sara na tamata kecega sa tiko kina; sa sega ni laiva ko koya e dua me vo tu kina: me vaka ka kitaki Epironi ko koya, sa kitaki Tipiri vakakina, kei na kena tui; me vaka ka kitaki Lipina talega, kei na kena tui.
40A sa samuta ko Josua na vanua vaka-ulu-ni-vanua kecega, kei na vanua sa no vaka ki na ceva, kei na vanua vakabuca, kei na vanua vakamata-ni-wai, kei na nodra tui kecega: sa tawa laiva e dua me vo tu, ka vakamatea sara na ka kecega sa cegu, me vaka ka vakarota ko Jiova na Kalou nei Isireli.
41A sa mokuti ira ko Josua ka vakatekivu mai Ketesa-parinea ka yaco ki Kesa, kei na vanua taucoko ko Koseni, ka yaco ki Kipioni.
42A sa rawata kece na turaga o qori ko Josua kei na kedra vanua e na gauna ga ko ya, e na vuku ni sa totaki ira na Isireli ko Jiova na Kalou nei Isireli.
43A sa lesu ko Josua, kei ira vata kaya na Isireli kecega, ki nai tikotiko mai Kilikali.
Who We AreWhat We EelieveWhat We Do
2025 by iamachristian.org,Inc All rights reserved.
