Nai Vakatekivu 46 - AI VOLA TABU（FIJ1864）

Sa vakacegui Jekope na Kalou, ka sa lako sobu ki Ijipita ko koya, 1-7. A kawa i Isireli era sa lako ki Ijipita, 8-27. Sa laʼki veitata kei tamana ko Josefa; ka vakarautaki ira na veitacini me ra lako vei Fero, 28-34.

1A SA ia na lako ko Isireli kei na nona kecega, a sa yaco ki Pieri-sepa, a sa vakamatea nai soro vua na Kalou i Aisake na tamana.

2A sa vosa vei Isireli na Kalou, e na raivotu e na bogi, ka kaya, I Jekope, i Jekope! A sa kaya ko koya, Raica, koi au.

3A sa kaya, Oi au na Kalou, na Kalou i tamamu: kakua ni ko rere ni lako sobu ki Ijipita; niʼu na cakavi iko maikina me matanitu levu:

4au na lako sobu kei iko ki Ijipita; ia kaʼu na kauti iko cake tale vakaidina: ia ena tabaka na matamu ko Josefa e na ligana.

5A sa tu cake mai Pieri-sepa ko Jekope: ia ko ira na luve i Isireli, era sa kauti Jekope na tamadra, kei na nodra lalai, kei na watidra, e na veivale-vakayavana ka vakatala ko Fero me kauti koya.

6A ra sa kauta na nodra manumanu, kei na nodra yau, era a rawata e na vanua ko Kenani, a ra sa lako ki Ijipita, ko Jekope, kei ira kece kaya na nona kawa:

7a luvena tagane, kei na luvedra tagane na luvena tagane, vata kaya; na luvena alewa, kei ira na luvedra alewa na luvena tagane, kei na nona kawa kecega, sa kauta kaya ki Ijipita.

8Ia o qo ta yacadra na luve i Isireli era sa lako ki Ijipita, ko Jekope kei na luvena: ko Rupeni, na ulumatua i Jekope.

9Ia na luvena tagane ko Rupeni; ko Enoke, kei Falu, kei Esironi, kei Karimi.

10Ia na luvena tagane ko Simioni; ko Yimueli, kei Yamini, kei Oati, kei Yakini, kei Sobari, kei Saula, na luvena e dua na alewa ni Kenani.

11Ia na luvena tagane ko Levi; ko Kerisoni, ko Koaca, kei Mirari.

12Ia na luvena tagane ko Juta; ko Eri, kei Onani, kei Sela, kei Feresi, kei Sera; ia ko Eri kei Onani erau a mate e na vanua ko Kenani: ia na luvena tagane ko Feresi; ko Esironi, kei Amuli.

13Ia na luvena tagane ko Isakari; ko Tola, kei Fuva, kei Jopi, kei Simironi.

14Ia na luvena tagane ko Sepuloni; ko Sereti, kei Eloni, kei Yalieli.

15O ira o qo na luvena tagane ko Lia, a ya ka vakasucuma vei Jekope mai Petani-erama, kei Taina na luvena alewa: o ira kecega na luvena tagane kei na luvena alewa, era lewe tolusagavulu ka tolu.

16Ia na luvena tagane ko Kata; ko Sifioni, ko Aki, ko Suni, kei Esiponi, ko Eri, kei Eroti, kei Areli.

17Ia na luvena tagane ko Aseri; ko Imina, kei Isiva, kei Isivi, kei Piria, kei Sera na ganedra: ia na luvena tagane ko Piria, ko Eperi, kei Malikieli.

18O ira o qo na luvena tagane ko Silipa, o koya ka solia ko Lepani vei Lia na luvena alewa: ia ko ira o qo sa vakasucuma ko koya vei Jekope, era lewe tinikaono.

19Na luve i Rejeli, na wati i Jekope, ko Josefa kei Penijamini.

20A sa sucu vei Josefa e na vanua ko Ijipita, ko Manase kei Ifireimi, koi rau ka vakasucuma vua ko Asenaca na luve i Poti-fera na bete mai Oni.

21Ia na luvena tagane ko Penijamini; ko Pela, kei Pekeri, kei Asipeli, ko Kera, kei Neemani, ko Ei, kei Rosi, ko Mupimi, kei Upimi, kei Ariti.

22O ira o qo na luvena tagane ko Rejeli, o ira sa sucu vei Jekope: a tamata kecega era lewe tinikava.

23Ia na luvena tagane ko Tani, ko Usimi.

24Ia na luvena tagane ko Nafitali; ko Yasieli, kei Kuni, kei Yeseri, kei Silemi.

25O ira o qo na luvena tagane ko Pila, o koya ka solia ko Lepani vei Rejeli na luvena alewa; a sa vakasucumi ira o qo ko koya vei Jekope: o ira kecega era lewe vitu.

26O ira kecega na tamata ka lako kei Jekope ki Ijipita, ka ra lako mai na sagana, ko ira na tamata kecega era lewe onosagavulu ka ono, ia ka sa vo na watidra na luve i Jekope.

27Ia sa lewe rua na luve i Josefa, erau sa sucu vua mai Ijipita. Ko ira kece na tamata e na mataqali i Jekope era lako ki Ijipita, era lewe vitusagavulu.

28A sa talai Juta me liutaki koya vei Josefa, me vakarau vei koya mai Koseni; a ra sa yaco ki na vanua ko Koseni.

29A sa vakarautaka na nona vale-vodoki ko Josefa, ka lako cake me veitata kei Isireli na tamana, mai Koseni; a sa vakaraitaki koya vua: a sa baleta na domona, a sa tagi vakadede e domona.

30A sa kaya vei Josefa ko Isireli, Meʼu qai mate, niʼu sa raica oti na matamu, ni ko sa bula tiko.

31A sa kaya ko Josefa vei ira na veitacini, kei na mataqali i tamana, Au na lako cake, ka tukuna vei Fero, ka kaya vua, O ira na veitacini, kei na mataqali i tamaqu, ka tiko mai na vanua ko Kenani, era sa lako mai vei au;

32ka ra sai vakatawa ni sipi na tamata, ni ra sa tamata dauvakana manumanu; a ra sa kauta mai na nodra sipi, kei na nodra karavau, kei na nodra kecega.

33Ia ni sa kacivi kemudou ko Fero, ka vaka, A cava dou sa daukitaka?

34dou qai kaya, A nomuni tamata era dauvakana manumanu, ni keitou a gone ka yacova na gauna o qo, koi keitou, ko ira talega na neitou qase: mo dou tiko kina mai na vanua ko Koseni; ni sa ka vakasisila vei ira na kai Ijipita na tamata kecega sa dauvakana sipi.