Nai Vakatekivu 25 - AI VOLA TABU（FIJ1864）

A kawa i Eparaama ni sa watina ko Ketura, 1-4. Sa vota na nona yau, a sa mate, 5-10. A kawa i Isimeeli, 12-18. Sa sucu ko Jekope kei Iso, 19-26. Sa volitaka na nona ka ni ulumatua ko Iso, 29-34.

1A SA laʼki vakawati tale ko Eparaama, ia na yaca ni alewa ko Ketura:

2a sa vakasucumi Simirani, kei Jokisani, kei Metani, kei Mitiani, kei Isipaki, kei Sua, vei koya.

3A sa sucu vei Jokisani ko Sipa, kei Titani. Ia na goneatagane i Titani, ko Asuri, kei Letusi, kei Leumi.

4Ia na goneatagane i Mitiani, ko Ifa, kei Iferi, kei Enoke, kei Apaita, kei Elitea. O iratou kece o qo na luve i Ketura.

5A sa solia ko Eparaama na nona ka kecega vei Aisake.

6Ia vei ira na luvedratou na watina lalai i Eparaama, sa solia e so na ka ni loloma ko Eparaama, ka talai ira tani maivei Aisake na luvena, (ni sa bula tiko,) kivaka ki cake, ki na vanua e cake.

7Ia sa vakaoqo na siga ni yabaki ni bula i Eparaama, a ya ka bula kina ko koya, e dua na drau ka vitusagavulu ka lima na yabaki.

8Sa qai ciba ko Eparaama, ka mate yani, ni sa qase vinaka mai, ia sa tamata qase, ka mamau; a sa kumuni vei ira na kai nona.

9Ia koi rau na luvena ko Aisake kei Isimeeli, erau a buluta e na qara-vatu mai Makipila, e nona tiki ni vanua ko Efironi na luve i Sobari na luve i Eci, a ya sa donui Mamire;

10na tiki ni vanua ka volia ko Eparaama maivei ira na luve i Eci: sa buluti maikina ko Eparaama kei Sera na watina.

11Ia ni sa mate ko Eparaama, sa vakalougatataki Aisake na luvena na Kalou: a sa tiko ko Aisake mai nai keli-wai ko Leai-roi.

12Ia sa vakaoqo nai tukutuku ni kawa i Isimeeli, na luve i Eparaama, o koya sa vakasucuma vei Eparaama ko Ekari, na kai Ijipita, na vada i Sera:

13ia sa vakaoqo na yacadra na luvena tagane ko Isimeeli, e na yacadra me vaka na nodra veimataqali: na ulumatua i Isimeeli, ko Nepeioci, kei Kitari, kei Atipieli, kei Mipisami,

14kei Misima, kei Tuma, kei Masa,

15ko Etari, kei Tema, ko Jeturi, ko Nefisi, kei Ketema:

16o ira o qo na luve i Isimeeli, o qo talega na yacadra, me vaka na nodra veikoro kaukauwa, kei na nodra vale ni valu; e tinikarua na turaga me vaka na nodra veivanua.

17Ia sa vakaoqo na yabaki ni bula i Isimeeli, e dua na drau ka tolusagavulu ka vitu na yabaki: a sa ciba ko koya, ka mate yani, a sa kumuni vei ira na kai nona.

18A ra sa taukena na vanua mai Avila ka kauta ki Suri, a ya sa donui Ijipita, mai na sala vaka ki Asiria: sa yalani ko koya e donui ira na wekana kecega.

19A SA vakaoqo nai tukutuku ni kawa kei Aisake, na luve i Eparaama: sa sucu vei Eparaama ko Aisake:

20ia sa vasagavulu na yabaki i Aisake, ni sa kauti Repeka me watina, a ya na luve i Pecueli na kai Siria mai Petani-erami, na gane i Lepani na kai Siria.

21A sa vakamasuti Jiova ko Aisake e na vuku ni watina, ni sa yava: a sa vakarorogo vua ko Jiova, a sa kunekune ko Repeka na watina.

22A rau sa veivala na gone e ketena: a sa kaya ko koya, Kevaka sai koya, a cava kaʼu sa vakaoqo kina? A sa laʼki tarogi Jiova.

23A sa kaya vua ko Jiova, E rua na matanitu sa tiko e ketemu, ia e rua na vanua mai na ketemu, erau na tawasei; ia ena kaukauwa na vanua e dua ka malumalumu na vanua e dua; ia ko koya sa qase ena qaravi koya sa gone.

24Ia ni sa yaco na siga me vakasucu kina, raica, sa drua e ketena.

25A sa sucu mai nai kadua ka sa damudamu taucoko, sa vaka e dua nai sulu vutivuti; a ra sa vakayacana ko Iso:

26a sa oti, sa qai lako mai na tacina, a sa taura tu na bukubuku-ni-yava i Iso na ligana; a sa vakayacani ko Jekope: a sa onosagavulu na yabaki i Aisake ni rau sa sucu.

27A rau sa tubu na gone: a sa yaco me tamata vuku e na tobo manumanu e yavai va ko Iso, a tamata ni veikau; ia ko Jekope na tamata vala malua, a sa tiko e na vale malo.

28A sa lomani Iso ko Aisake, e na vuku ni sa daukania na manumanu sa tobo; ia ko Repeka sa lomani Jekope.

29A sa vakasasaqa kakana ko Jekope: a sa lako mai na veikau ko Iso, a sa viakana:

30a sa kaya vei Jekope ko Iso, Mo vakani au mada e na damudamu ko ya; niʼu sa viakana: (o koya sa vakatokai kina na yacana ko Itomi.)

31A sa kaya ko Jekope, Mo volitaka edaidai vei au na nomu ulumatua.

32A sa kaya ko Iso, Raica, kaʼu sa laʼki mate; ka cava na kena yaga vei au na ulumatua?

33A sa kaya vua ko Jekope, Mo vosavavakini vei au edaidai: a sa vosavavakini vua; a sa volitaka na nona ulumatua vei Jekope.

34A sa solia vei Iso ko Jekope na madrai, kei na kakana pini; a sa kana ka gunu, ka tu cake, ka lako yani. Ia sa beca ko Iso na ulumatua.