Marc 16 - Duw ar waith (The Good News According to Mark) 1990

16. IESU YN ATGYFODIAtgyfodiad Iesu (Marc 16:1-8)

1-8Pan oedd y Saboth drosodd, prynodd Mair Magdalen, a Mair mam Iago a Salome, beraroglau, er mwyn eneinio corff Iesu. Yn fore iawn, ar y dydd cyntaf o'r wythnos, daethon nhw at y bedd. Ar y ffordd dwedon nhw wrth ei gilydd, “Pwy a gawn ni i symud y garreg sy ar draws yr agoriad?” Wedi iddyn nhw gyrraedd y man ac edrych i fyny, gwelon nhw fod y garreg fawr wedi'i symud. Aethon nhw i mewn i'r bedd, a gweld dyn ifanc mewn gwisg laes, wen yn eistedd ar yr ochr dde. Cawson nhw dipyn o fraw, ond dwedodd y dyn wrthyn nhw am beidio â phryderu. “Rydych chi'n ceisio Iesu o Nasareth a groeshoeliwyd. Dydy e ddim yma, mae e wedi cyfodi. Edrychwch, dyma'r lle y rhoddon nhw fe i orwedd. Ewch a dwedwch wrth ei ddisgyblion ac wrth Pedr, ‘Mae e'n mynd o'ch blaen chi i Galilea, ac fe gewch ei weld yno, fel y dwedodd wrthoch chi.’ ” Rhedon nhw allan o'r bedd yn crynu gan ofn, ond ddwedon nhw ddim wrth unrhyw un.

Iesu'n Ymddangos i Fair Magdalen (Marc 16:9-11)

9-11Wedi i Iesu atgyfodi, yn fore ar ddydd cyntaf yr wythnos, ymddangosodd i Fair Magdalen i ddechrau. Cyn hynny, roedd e wedi bwrw saith gythraul allan ohoni. Aeth hi, a dweud y newyddion wrth ei ddilynwyr yn eu tristwch. Doedden nhw ddim yn credu bod Iesu yn fyw a'i bod hithau wedi ei weld.

Iesu'n Ymddangos i Ddau Ddisgybl (Marc 16:12-13)

12-13Ar ôl hynny, ymddangosodd Iesu eto mewn modd arall i ddau o'r disgyblion fel roedden nhw'n cerdded ar eu ffordd i'r wlad. Aethon nhw i ffwrdd a dweud wrth y lleill, ond doedden nhw ddim yn credu chwaith.

Rhoi Comisiwn i'r Disgyblion (Marc 16:14-18)

14-18Ar ôl hyn i gyd, ymddangosodd Iesu i'r un disgybl ar ddeg pan oedden nhw'n cael bwyd, a dwedodd wrthyn nhw am eu diffyg ffydd a'u hystyfnigrwydd yn peidio â chredu'r rhai oedd wedi'i weld ar ôl iddo atgyfodi. Dwedodd, “Ewch i'r holl fyd a chyhoeddwch y Newyddion Da i bawb. Bydd y rhai sy'n credu a chael eu bedyddio yn cael eu hachub, ond bydd y rhai sy'n gwrthod credu yn cael eu condemnio. Hefyd, bydd y credinwyr yn gallu bwrw allan gythreuliaid yn fy enw i, a siarad mewn ieithoedd dieithr. Ddaw dim niwed iddyn nhw o afael mewn nadroedd nac o yfed gwenwyn marwol, a phan ddodan nhw eu dwylo ar gleifion, bydd rheini'n gwella.”

Esgyniad Iesu (Marc 16:19-20)

19-20Wedi iddo siarad â nhw, cafodd yr Arglwydd Iesu ei gymryd i fyny i'r nef ac eisteddodd ar law dde Duw. Aeth y disgyblion allan a phregethu ym mhobman, a'r Arglwydd yn cadarnhau eu gwaith gyda gwyrthiau.